香港人，香港事，今次殺到中環，當然全文畢錄畀大家睇。 Medium 嘅朋友，下面都有連結，慢用。
Medium Link: https://link.medium.com/ty6IwSzeVZ
- - -
2019 年 9 月 12 日，一個普通到唔恨嘅星期四。呀，係中秋節前嘅「迎月」。一朝早，朋友傳咗呢幅圖畀我。
咁我諗，近期香港人唱《願榮光歸香港》唱到遍地開花，進駐各大商場，犀利過聖誕唱聖詩、農曆年舞獅。咁鄰近地區嘅子民眼紅妒忌甚至睇唔過眼，要東施效顰，都係人哋嘅自由。
反正人在中環，午飯時間去 IFC 食下花生，觀摩一下呢啲所謂愛國份子，喺香港金融核心地帶可以點樣貽笑大方。
將近下晝一點，我由 Apple Store 嗰邊轉進中庭，離遠已經見到一幅又大又紅嘅布，上面有五粒星。喺旗嘅下面，有一大堆人形物體揮舞住一啲面積細好多，紙造嘅紅底黃星星星星星圖案。
呢堆生物嘅衣著相當多元化，有啲係典型旅行裝束，男嘅著 Polo ，女嘅老撚土。仲有有約三成嘅人，係著中環人指定裝束：恤衫、西褲。
或者我去到嘅時候已經遲咗少少，冇真係聽到嗰首《義勇軍進行曲》或者咩《歌唱祖國》，反正我聽到都係「香港人，加油」，冚晒。
原本我只係路過，諗住買個飯糰架咋。點知中庭人多擠迫，留返條通道，竟然就係中港矛盾嘅最前線。左邊「加油」，右邊「渣友」，聽到我吖⋯⋯
由於班大媽大叔同港漂嘅氣焰太囂張，我作出一個決定：停低，企入人群入面，一邊嗌口號，一邊開 Facebook Live ，影低班醜八怪嘅嘴臉。
- - -
如果大家以為中環人都係金錢至上、政治冷感，我可以話畀大家知，唔係咁樣。事實上，由中庭去到接近戲院對開，七八成都係喺附近返工嘅朋友，當中有香港本地人，亦有啲鬼佬。大家明顯地對於 IFC 被踩場相當不滿，要蓋過外來入侵者嘅聲勢。
咁大陸人係面皮薄，又要充大頭嘅。雖然明知 IFC 係香港人地頭，四方八面以至上一層樓圍觀嘅主要都係香港人，但係佢哋仍然選擇圍堵手持「五大訴求、缺一不可」標語嘅年輕人，甚至搶走及撕碎標語，喺鏡頭面前嘲諷香港人，認真勇氣可嘉。
冇嘅，中環人，斯斯文文，動口不動手 (至少日光日白都係咁) ，咪繼續嗌口號，甚至同班大叔攬頭攬頸，高呼「平反六四」，送佢哋一程囉。後來有啲大陸人情緒激動，作勢想講手，都畀人勸退咗。
吖，我醒起，去到尾段有個方形面、白恤衫嘅四眼佬出現，成個憤怒青年咁起勢屌香港人。睇清啲，仆你個街馮煒光嚟嘅？
- - -
IFC 內嘅呼聲此起彼落，班港漂對住成班 OL 同西裝友叫「曱甴」同「暴徒」係令人大惑不解嘅 (其實我都唔明佢喺今日喺 IFC 想耀武揚威做乜鳩) 。咁香港呢邊叫返佢哋「垃圾」同「返大陸」，相比之下就合理好多。
企喺接近前線嘅位置，我一邊開 Live ，一邊嗌「香港人」或者「光復香港」 (喺 battle mode 之下，你唔會嗌埋「加油」同「時代革命」，只可以交託畀其他同路人，否則會缺氧斷氣) ，真係冇為意把聲已經拆撚晒。用咗丹田架喇，諗住。
爭持咗廿幾分鐘左右，塊紅底黃星星星星星布 (擺明呃字數) 已經退場，其他遊客同港漂都陸續退場。我就冇留低繼續唱《榮光歸香港》喇，一來好攰，二來真係肚餓。都話咯，我本來只係一個路過買飯糰嘅打工仔。
Search